Dr. Sasa nih, “Uknak firtu ralkap nih ‘ram rawitu’ tiin taza an ka cuaimi cu kai uang tuk,” tiah cathanh a chuah.
“Aruang cu, uknak firtu ka rawi hna ahcun Myanmar mipi ka dirpi hna, an luatnak, federal democracy le an covo an co khawhnak dingah ka nunnak ka pek lai tinak asi,” ati.
“Tuni ah ram rawitu aa ka timi ralkap bawi pawl nih hin ka mi hna an hremmi hna, hlawh pek loin hramhram in rian an ṭuantermi hna, an tlerhmi hna, an tlaihhremmi hna le an thahmi hna cu ka ngakchiat tein ka hmuh peng. Mah ralkap bawi pawl hi hriamnam ngei lo rammi pawl zalam cungah thah dingin nawl a chuahtu an si.
“Phungninglo in uknak a firtu ralkap nih hin liamcia kum 70 chung Chin, Rakhine, Mon, Shan, Kayah, Karen, Kachin, tbk tlangmi pawl tuksapur taktak in an thahnawn peng hna. Kum 1988 ah, buai lo tein sandahpiahmi siangngakchia a zaza an rak thah hna. 1997 ah, hriamnam ngeilo rammi an rak thah hna. 2007 ah, Buddhist phungki pawl an tukvelh hna i an thahnawn hna. 2017 ah, Rohingya miphun an cihmih dingin nawl an chuah. Kan ram nih ramdang uknak in luatnak kan hmuh thokin, rammi vengtu ding a simi ralkap nih hin rammi a kan thahnawn i a kan temhtuar ter peng.
“Mah ralkap bawi pawl hi ni fatin ram a rawi pengmi an si. An duhmi paoh an i lak. Mipi an covo an pe hna lo, an hmai a dirmi paoh an nawn dih hna.
“Mah ralkap bawi pawl hi an tuhmi theipar kan zunter hna hlan lo kan i din lai lo.
“Ram rawitu tiin taza an ka cuaimi hi, uknak firtu ralkap nih kan tei kho ti lo ti an i hngalh i vansan tuah awk hngalh lo ah an tuahmi asi.
“Federal democracy nih teinak a hmuh lai.
“Luatnak nih teinak a hmuh lai.
“Dinnak nih a tei lai,” ati.
Atangah Mirangca in tling tein rel khawh asi.
