Mandalay ramtthen, Pyi Gyi Tagon khua ah inn 60 leng mei nih a kangh i minung 500 hrawng cu inn ngei loin an um.
March 28, zaanttim sml 1:30am hrawng ah mei kangh aa thok i zaanttim sml 2:15am fai ah an hmih khawh.
“Motorcycle pakhat a ra i datsi bomb in a cheh i cutin mei kaang aa thok tiin an chim kan theih. Inn a kaang an ti sin tein i tuai cio si i a cheptu cu an tlai kho lo,” tiah khuami pakhat nih a chim.
“Hika zawn cu electric mei a ngah lonak sau tuk cang i electric mei ruangah a kaangmi cu si hrimhrim lai lo,” tiah min langhter lomi nu pakhat nih a chim.
Mei kangh lio ahhin meithat zung an chawnh ko nain ralkap nih meithal voi 3 an puah i lampi ah an kham hna.

Meithat Zung an chawnh lio ahcun meithat motor 15 kuat an timh ko hna nain a phan takmi cu 3 lawng a si.
Mei a kangh minutes 45 hrawng hnu ah mei cu an thah khawh.
“Mei a kanghnak hi sifak (ttuanchom, eichom) tampi an umnak hmun a si i mei kaang ruangah inn ngei lo in an um pinah dinei awk le thilpuan bawmh an herh,” tiah meikaang tuar bawmtu pakhat nih a chim.
Mei kangh ning a ran tuk caah an thilri zeihmanh chuah manh loin a kangh chih dih hna.