Miphun hriamtlai phu 12 i fonh in an rak dirh nain a rawk cangmi “Miphun Fonhmi Federal Council (UNFC)” bantuk dirh ṭhan kan timh, tiah Pao (PNLO) hriamtlai phu ralbawi Khun Okka nih a chim.
“Uknak chuttu ralkap cozah a dotu mipi nih federal army dirh an duh. NCA minsen a thutmi he thut lomi he miphun hriamtlai phu vialte nih khua kan khan a hau.
“NCA minsen a thutmi miphun hriamtlai phu 10 fonh (PPST) nakin a ṭhawng deuhmi UNFC bantuk dirh hram kan thok cang i kan dirh khawh deng cang,” tiah PPST chungtel a si vemi PNLO ralbawi Khun Okka nih a chim.
UNFC cu Karen hriamtlai phu KNU le Kachin hriamtlai phu KIA telh in hriamtlai phu 12 nih rak dirhmi asi. Kum 2015 ah hriamtlai phu cheukhat nih Myanmar ralkap he kan i kap ti lai lo tiin NCA sachoh ah minsen an thut caah UNFC cu a rawk.
“Miphun tampi fonhmi ralkap bu dirhnak ding ahcun caan tlawmpal a rauh lai caah mipi nih lungsau tein na kan hngah a hau,” tiah PNLO ralbawi Khun Okka nih a chim.
Mah bantuk ralkap bu cu dirh dingin khuakhangtu phu an dirh cang i May thla ahcun thawngpang fiang deuh a um te lai tiah zumh asi.
NCA minsen a thutmi hriamtlai phu 10 (PPST) zong nih April 4 ah “ralkap cozah dohnak CDM le mipi nih an tuahmi Pau Dothlennak kan dirkamh hna,” tiah thawng an thanh.
“2020 November 8 thimnak mipi nih an thimmi MP pawl (CRPH) nih 2008 Phunghram a hrawhmi cu kan lungtling. Cun, CRPH nih Federal Democracy Phunghram a sermi zong kan pom,” an ti.
CRPH zong nih “April thla zarh 1nak ah Mipi Lungrualnak Mipi Cozah kan dirh lai” ati.
PPST ruahnak petu U Khun Sai nih, “Hriamtlai phu cheukhat nih cun, kan i fonh hrim hau cang tiah an ruah ko. Anmah hriamtlai phu cio nih biakhiahnak tuah a hau hnga,” tiah a chim ve.
Ralbawi Khun Okka nih cun, “Hriamtlai phu pawl kan i fonh lai an ti si le an i fonh ko lai. CRPH nih a dirhmi phu ah kan i tel lai an ti le an i tel ko lai. Hi cu hriamtlai phu pakhat cio nih bia an khiah haumi si. PPST nih cun ‘fonh’ timi biafang kan hmang lo. Kan i bawm lai, rian kan ṭuanṭi lai,” ati.