2020 Thimnak ah CNLD party in Chin State Hluttaw 2 MP aa cuh i teinak a hmumi Pu Siang Mang inn cu nizaan January 12 ah uknak firtu Myanmar ralkap nih an chuh.
Nizaan chun 11am hrawngah ralkap 30 hrawng cu Pu Siang Mang inn ah an kal i kutka ah ‘inn chuhnak catar senpi’ an benh.
Catar sen an benhmi ahcun, “Mah inn ahhin ralhrang pakhat an umter caah ralhrang dohnak upadi in inn ngeitu (Pu Siang Mang) cu kan tlaih thongthlak lai pinah, a inn zong upadi pohmah 56 in ram thilri ah kan chuh lai,” tiin an ṭial.
![](https://thechinexpress.com/wp-content/uploads/2022/01/271826421_298259759003029_7127263000152314398_n.jpg)
Pu Siang Mang chungkhat minung 1 nih, “Zei ruang dah hitin an tuah ti kai fiang kho bak lo. Ralhrang dohnak upadi in an ti fawn. Cun, nan duhmi thilri paoh la dih ulaw nan lak dih hnu ah inn kan hrenh lai an ti,” tiah a chim.
Pu Siang Mang lawng hi 2020 Thimnak ah CNLD party in teinak a hmumi si.
2021 October 30 zongah Hakha, Dawrthar sanng um Dr Lian Hmung Sakhong inn cu ralkap nih an chuh. Dr Sakhong cu CNF Vice Chairman 2 asi pinah NUG cozah i Federal Ram Dirhnak Vuanci zong asi.
![](https://thechinexpress.com/wp-content/uploads/2022/01/Pu-Siang-Mang-inn.jpg)
Tutan he cun ralhrang nih Hakha ah inn an chuhmi hna hi 2 asi cang.
Ref: Chin World