Ralkap nih minung 19 cu thih dan a pek hna (thah dingin nawl a chuah), tiah ralkap media MRTV le Myawaddy TV nih zahan zaan ah an thanh.
March 27 ah Ralkap Ni (တပ်မတော်နေ့) puai kan tuah lio ah, Yangon ramṭhen, North Okkalapa peng ah motorcycle in a rami ralkap bawi le a zultu cu mibu nih an velh hna.
Ralkap bawi a zultu ralkap pa cu a ṭang ah pakhatkhat in an sawh caah a thi. Ralkap bawi cu hliam a tong. An meithal zong an chuh hna.
Mah ruang cun April 8 ahkhan ralkap biaceihzung nih thah ve hna dingin thih dan a pek hna, tiah ralkap TV nih an chim.
A fiang lomi um aikun – “Thih dan pek (sentence to death)” timi cu cozah nih thah asi. Thih sii an chunh hna silole hri in an thlai thah hna. “Nun chung thongthlak (sentence to life or life in prison)” timi cu cozah nih an that hna lo. An thih tiang thong an thlak hna. Mah 2 hi cawh sual lo ding.
Minung 19 thah an timhmi hna lakah 2 lawng an tlaih khawh rih hna i adang 17 cu tlaih dingin an kawl cuahmah hna lio asi.
North Okkalapa le Yangon ramṭhen peng tampi cu ralkap upadi hman dingin ralhrang ralkap cozah nih nawl a chuah i mipi biaceihzung ah tazacuai loin ralkap biaceihzung ah taza a cuai thluahmah hna.
Ralkap biaceihzung nih bia a khiahmi cu cunglei biaceihzung ah nawl a ngah ti lo, nain ralhrang bawizik Min Aung Hlaing le Yangon ramṭhen ralkap bawi nih ngaihthiam khawh asi.
Liamcia kum 30 chungah, Myanmar biaceihzung nih thih dan a rak pek pah ve lengmang hna nain a that taktak bal hna lo, dantatnak niam deuh ah a ṭhumhpiak ṭhan tawn hna.
Ralkap nih uknak a fir hnu in tutan hi avoi 1nak bik mipi thah dingin thih dan a pek hna si.
March 27 cu Myanmar ralkap nih zalam cungah sandahpiahtu mipi tambik a thah hna ni asi i minung 107 leng a thah hna. Uknak a fir thokin atutiang ah rammi 618 a thah cang hna.
