Australia Chin khrihfabu funtomnak bu Chin Christian Council in Australia (CCCA) hruaitu Rev Dr Dennis Shu Maung nih, “Ramthumnak phan Chinmi hna hi atu lio Kawlram um Chinram le Chin miphun chanh dingah ṭuanvo nganpi kan ngei. A har ko lai, i hnek ko usih,” tiah Australia, US le ramthumnak um Chinmi vialte a sawm hna.
“Kan fale Generation Z an timi mino tete nih an hmuhmi hriamnam i tlaih in Chin miphun le Chinram khamh dingah nunnak thap in ralhrang cu an doh cuahmah lio asi ve. Caan sau deuh a nguhmi rawl fangvoi reu an i sanh i ‘Dawtmi hna, inn ah ka rak kir ṭhan khawh tilo ahcun nan ngaihchia hlah u, khua le ram le miphun luatnak dingah a nunnak a pek tiin lungsaknak rak ngei te ko u’ tiah biabeuh an chim hnu ah an dawtmi hringtu nulepa, chungkhar unau, ni le far hna cu kaltak in nilin, ruahsur, hlingso, sahrang le cangvet ṭihlo in ram tang ah an vai.
“Ralhrang Kawl Ralkap nih Laitlang cu vutcam ah ser an timh cang caah kan ram le kan miphun runvennak caah hriamnam ṭha cawk lawng si tiloin vanlawng kahnak hriam hrimhrim hi kan cawk a hau cang. Hi vanlawng kahnak hriam hi a man a sang i atu bak ah cawk a hau cang fawn. Cucaah a tambik na ti khawh chungin “vun i hnek law na kut samh ko” tiah kaan nawl i kaan sawm. A har ko lai i hnek ko usih.
“Ram le miphun nih nangmah thengte atu ah aan hlam,” ati.
A HAR KO LAI IHNEEK KO USIH
Dawtmi ule nau hna,
Kawlram ah mipi a thattu rallokap ralhrang nih ningcang loin tleih le hrem le thah asi caah mipi zong nih an ngeihmi hriamnam ilaak in mah pum ralveennak an tuah ve cang.
Laitlang zongah rallokap ralhrang nih kan dawtmi kan phun hawi unau hna cu an thah lengmang hna lio asi. Pathian dahlo cu Chanhtu an ngei lo. Cozah zong a um ti lo. Ramthumnak a phaanmi nangmah le keimah kan i thawh hrimhrim a hau cang. A har ko lai ihneek ko usih.
Tutan ahhin ramthumnak a ummi Chinmi nih kan ruah ding cu “zei ruangah dah Pathian nih ramthumnak hi a ka phanhter” tihi asi. Ramthumnak a phanmi Chinmi hna hi atulio Chin Cozah cu kan si. Kawlram a ummi Chinram le Chin miphun chanh dingah ttuanvo nganpi kan ngei. A har ko lai ihneek ko usih.
Kan fale Generation Z an timi mino tete nih an hmuhmi hriamnam itleih in Chin miphun le Chinram khamh ding ah nunnak thaap in ralhrang cu an doh cuahmah lio asi ve. Caan sau deuh a nguhmi rawl, fangvoi reu an i sanh i “Dawtmi hna, inn ah ka rak kir tthan khawh tilo ahcun nan ngaihchia hlah u, khua le ram le miphun luatnak dingah a nunnak a pek ti in lungsaknak rak ngei te ko u” tiah biabeuh an chim hnu ah an Dawtmi hringtu nu le pa, chungkhar u le nau, ni le far hna cu kaltak in nilin, ruahsur, hlingso, sahrang le cangvet ttihlo in ram tang ah an vaai.
Cubantuk in fale nau nih nunnak pek in dothlennak an tuah lio ah motor tthatha i mongh i rawldawr tthatha ah nuamngang in puai tuah i eidin le tangka a tampi vonhman ko kha le nuamseih duh ah hauleeng chuak in duh thlaimai in holiday kal i tlonleen kan hman tawnmi vialte kha ngol rih usihlaw ram le miphun caah ihneek deuh usih.
Ralhrang nih Laitlang cu capvam ah ser ding an timh cang caah kan ram le kan miphun runveennak caah hriamnam ttha cawk lawng si tiloin vanlawng kahnak hriam hrimhrim hi kan cawk a hau cang. Hi vanlawng kahnak hriam hi a man a saang i atu bak ah cawk a hau cang fawn. Cucaah a tambik na tikhawh chungin “von i hneek law na kut samh ko” tiah kaan nawl i kaan sawm. A har ko lai ihneek ko usih.
“Ram le miphun nih nangmah thengte atu ah aan hlam”
Ram le miphun luatnak caah ti in,
Dennis Shu Maung
CCCA Gen. Secretary
Victoria, Australia
