Mon state, Thaton pengah sandahpiahmi mipi vengtu Karen hriamtlai phu KNU/LA nih uknak firtu ralkap a tlawmbik 2 an thah hna, tiah The Irrawaddy nih a thanh.
KNLA (KNU) le ralkap cu zahan ah an i kap. Ralkap a tlawmbik 2 an thi, 4 hliam an tong, tiah khuami nih an chim.
Khuami pakhat nih, “Sandahpiahmi mipi vengtu KNLA ralkap pawl le uknak firtu Min Aung Hlaing ralkap pawl cu zahan ahkhan Thaton peng hmun 2 ah an i kap,” tiah a chim.
“Khua chung sianginn pawngah minung 100 hrawng nih ralkap cozah duhlonak le NUG thapeknak sandah an piah.
“Sandahpiahtu pawl dawi dingin Myanmar ralkap 10 hrawng an ra. Sandahpiahnak hmun an phak hlan ah, KNLA nih an kan kahpiak hna,” ati.
An i kah lio ahcun sandahpiahmi pakhat a ke ah an khen i hliam tong.
Ralkap cu an zaam nain, hnu ah ralkap tam deuh he an raṭhan i sandahpiahnak pawng ah meithal an puah thluahmah. Sinain sandahpiahmi an zaam dih cang i hohmanh hliam an tong ti lo.
Zahan zingka ah KNLA le ralkap an i kah caah Yangon-Mawlamyine highwah lampi zong chikhat an khar.
Zaan 10pm hrawngah, Myanmar ralkap nih sandahpiahmi vengtu KNLA ralkap umnak pawng khuate pawl cu miakpi in voi tampi an kah. Mah ruangah khuami a zaza nih khua an zaamtak.
Ralkap nih uknak a firmi cu KNU nih zapi theih in duhlonak cathanh a chuah caah ralkap nih an kah lengmang hna i an karlak ral a fak ngai.
KNU hruaitu Padoh Saw Mutu Say Poe nih, “Uknak firtu Min Aung Hlaing nih mipi thah na ngol hlan lo le na tlaihmi vialte na thlah hna hlan lo cu kan in tong lai lo [kan in kah peng] ati,” ati.
