Tang lam in Malaysia a ra Kawlrammi 62 cu Thailand ram in Malaysia an luhka te ah an tlaih hna.
Malaysia ram, Kelantan state i Pasir Mas khua ah kan tlaih hna, tiah Pasir Mas palik bawi nih cozah media Bernama sinah a chim.
“Pawngkam mi nih an kan chimh caah, January 11 ah ramri um Pasir Mas khua ah inn pakhat kan luhhnawh i kum 31 pa kan rammi pakhat le ramdangmi 16 kan hmuh hna.
“Ramdangmi cu Myanmar in a rami lawngte an si. Nu 9 le pa 7 an si. Malaysia ratnak visa le passport zeihmanh an ngei lo.
“Kan rammi kum 31 pa cu bia kan hal hnu ah inn pakhat kan luhhnawh chap i kan rammi nuva kan tlaih hna. Ritsi tlawmpal le an motor pakhat zong kan tlaih chih.
“Rammi 3 le Myanmar rammi 16 cu ni tlawmpal chung bia kan hal hmasa hna hnu ah biaceihzung ah chuahpi le Myanmar rammi cu upadi an buarmi man thongpi ah caan zeimawzat thlak hnu ah an ram ah kuat an si te lai. Atu cu palik sakhan thong ah kan thlak chung hna,” ati.
January 10 ah 46 an tlaih hna
January 10 zongah Thailand ram in Malaysia a hung lutka mi Myanmar rammi 46 cu Pasir Mas khua ah Malaysia palik nih an tlaih hna — Pasir Mas khua cu Thailand he aa rimi asi i Malaysia le Thailand i pehtlaihnak/luhnak lam a umnak asi.
Myanmar rammi 46 cu kum 11 in 44 kar an si.
Inn number zong aa ṭial lomi dawr pakhat cu January 10 zaanlei 4:45pm ah palik nih an luhhnawh i a chungah aa thupmi pa ngakchia pakhat le nu 5 an hmuh hna. Kum 11 in 17 kar an si.
“Kan check hna i ahohmanh Malaysia luhnak visa an ngei lo. Pasir Mas khua palik sakhan ah kan kalpi hna.
“Thailand pa nih nizaan ah motor pakhat in Malaysia a kan luhpi i amah nawl in hika dawr ṭhing chungah a kan chiah, tiah Myanmar rammi nih cun an i vuankhan.
“Zaan 10pm ah Jeram Perdah sang ramlak ah Malaysia a hung lutka mi Myanmar rammi 40 kan tlaih ve hna. Burbuk phen ah an rak i thup len. Kum 14 in 44 kar an si.
“An zaam len nain an luat lo. Kan check hna i Malaysia luhnak visa an ngei lo. Thailand ramri in Jeram Perdah (Malaysia) ah phungninglo ramdangmi an luh tawnnak lam a um. Mahka cun an luh hnu ah burbuk lakah an i thuh hi si men lai.
“Kuala Lumpur ah rianṭuan dingin a rami lawngte an si. A ratpi tu hna minung kan hlat kawl cuahmah lio asi,” ati.
