Uknak firtu Myanmar ralkap nih sandahpiahtu mipi a tukvelh, tlaih i thahnawn hna caah minung tampi an zaam kho men tiin Thailand nih Myanmar ramri khuapi ah tampi Myanmar ralzaam dornak hmun (refugee camp) a timhtuah cang hna.
Innpa ram a simi Myanmar boruak a chiat chin lengmang caah minung a tomtom in an zaam te kho men tiin Mae Hong Son le Tak ramkulh ah Myanmar ralzaam/refugee umnak inn an timhtuahmi pawl cu Thailand Army Bawizik Narongphan Chitkaewtae nih Nikhatni ahkhan a va zohfel hna.
Mae Sot, Tha Song Yang, Mar Ramat le Phob Phra peng ah Myanmar refugee umnak caah hmun 7 an timhtuah hna, tiah Thailand media Thai PBS World nih a thanh.
Myanmar ram Payathonzu (ဘုရားသုံးဆူ) khua he aa rimi Kanchanaburi ramkulh zongah minung 2,000 tlum ding hmun 4 cu Myanmar refugee caah an timhtuah cang hna.
Kayin state um Payathonzu (ဘုရားသုံးဆူ) khua cu tanglam in Malaysia a ra Chinmi tampi Thailand kan luhnak lam asi.
Thailand khua Mae Sai le Mae Sot ral te ah a ummi Myanmar khuapi Tachileik le Myawaddy ah sandahpiahtu pawl ralkap le palek nih an tukvelh, tlaih i thahnawn thluahmah hna caah ramri Thailand pawl zong an thin an i domh ko.
