Thawngpang thar: January 6 ah inn 13 an khangh chap. Atanglei hi hmasa kan ṭialmi asi.
Myanmar ralkap nih January 3 – 5 tiang ni 3 chungah Thantlang khua inn 127 an khangh. Inn 800 leng an khangh cang.
Tutan an khanghmi chung ahhin biakinn le biakinn zunng inn 5 zong an i tel. 5 hna cu;
- JMBC Quarter
- Methodist Biakinn
- Methodist Quarter
- Gospel Biakinn le
- Gospel Quarter hna an si.
Tutan an khangmi inn 123 ngeitu hna min cazin cu atang hmanthlak ah zoh khawh asi.
Uknak firtu Myanmar ralkap nih September 9 in Thantlang inn khangh an thok i atutiang ah inn 800 leng an khangh cang. Mah chungah biakinn le biakinn zung 42 leng an i tel.
- Avoi 1nak September 9 ah inn 1
- Avoi 2nak September 18 ah inn 19
- Avoi 3nak October 29 = inn 164
- Avoi 4nak November 6 = inn 8
- Avoi 5nak November 9 = inn 2
- Avoi 6nak November 10 = inn 7
- Avoi 7nak November 11 = inn 3
- Avoi 8nak November 24 = inn 49
- Avoi 9nak November 27 = inn 96
- Avoi 10nak December 4 = inn 20
- Avoi 11nak December 5 = inn 38
- Avoi 12nak December 8 = inn 23
- Avoi 13nak December 18-20 = inn 65
- Avoi 14nak December 30 = inn 55
- Avoi 15nak December 31 = inn 4
- Avoi 16nak 2022 January 3- 5 = inn 123
- Avoi 17nak January 6 = inn 13 tiin a dihlak inn 800 leng an khangh cang.
Thantlang khua cu inn 2,000 hrawng a um i minung 10,000 hrawng an umnak asi.
Thantlang khuami vialte cu September thla dongh lai ah India ramri lei ah an zaam dih cang hna. Cheukhat cu ramri khuate ah an i dor, cheukhat cu India ram, Mizoram state ah an zaam.
Tangka ting thong tampi dih in sakmi, Thantlang khua a dawhtertu zalampi tomi inn ṭhabik le dawr vialte cu Myanmar ralkap nih an khanghmi inn 727 chung ahhin an ciam dih cang.
Thantlang khuami thong tampi cu ral daih hnu ah kir duh hmanh hna sehlaw inn an ngeih ti lo pinah an thilri vialte zong a kangh dih cang caah an harsa tuk lai. Asi khawh ahcun ralzaam sok in ram thumnak hna phan kho hna sehlaw an caah a ṭha deuh ngai lai – ramchung ramleng kan pale hna nih ram thumnak kal kho dingin chimrel (advocate) piak hna sehlaw ṭha tuk hnga.
India ram, Mizoram state i Farkawn khua ah a zaammi Pi Mah Tial nih, “Ka fale 3 hi sianginn an kai khawh i rian an ṭuan khawhnak hnga ram thumnak ah kal kho hna seh ti ka duh,” tiah vawleicung media nganbik a si vemi Reuters sinah a chim.- Advertisement –
“A liam cangmi cu khirh awk ṭha ti lo. Ka fale kong ka ruah ah ka lungrethei. Ka fale tal hi cu an khuasak fawi deuhte seh ti ka duhpiak hna,” ati — mah hi hmet law tling tein Reuters ṭialmi rel khawh asi.
Chin state cu minung ting 4 fai lawng kan umnak asi. 2021 February ah Myanmar ralkap le USDP nih mipi thimmi cozah uknak an chuh thokin Chin state mipi thong 70 (70,000) hrawng ralzaam dirhmun ah kan um cang. 30,000 hrawng cu ramleng ah an zaam i 40,000 hrawng cu ramchung khuate le ramtang ah an zaam hna.
