Russia nih tu zingka in a innpa Ukraine ram cu vanlawng missile, drone le tank in voi tampi a kah caah Ukraine ralkap 40 leng le mipi 10 leng an thi, tiah Ukraine President Zung nih a thanh.
Hliam a tongmi zong 30 leng an si cang.
Ukraine President ruahnak petu Pu Oleksiy Arestovych nih, “Ralkap 40 leng an thih pinah, atutiang kan theih tawk ah mipi 10 leng an thi ve,” tiah a chim.
Russia nih Ukraine khualipi Kyiv cu vanlawng missile in voi tampi a kah. Khuapi dang pawl zong tank le missile in voi tampi a kah hna.
Russia nih a kahmi tam deuh cu Ukraine ralkap sakhan pawl an si. Nain mi sawhsawh umnak inn pawl zong alh dihlak in a kah hna.
Russia ralkap ting 2 hrawng nih tank le missile tampi he Ukraine ram cu a kenkip in an luhhnawh thluahmah.
Russia nih 2014 ah a tuk lakmi Ukraine ram, Crimea state lei zong in tam taktak an lut.
Ukraine state tam nawn ah Russia ralkap tam taktak tank le missile he an lut cang.
Ukraine nih Russia ralkap vanlawng 6 a kah thlak
Ukraine ralkap bawizik nih, “Ukraine ram kah aa thawhmi Russia ralkap vanlawng 6 kan kah thlak cang,” tiah thawngthanh.
“Hnu bik kan kahthlakmi cu Kramatorsk khua pawng ah asi. Vanlawng 6 pinah helicopter 1 zong kan kah thlak,” ati.
Russia nih, “An lihmi si. Kan vanlawng le helicopter an kahthlakmi pakhat hmanh um lo,” ati ve.
“Russia nih Ukraine lak dingin a tukmi hi tuksapur taktak asi. Cucaah, Russia cu a fak bikmi sipuaizi phihkhamnak kan tuah colh lai,” tiah EU President Ursula von der Leyen thawngthanh.
“EU ram 27 um Russia chawva vialte hman khawh lo dingin kan khar piak dih hna lai pinah Russia bank vialte EU ram 27 ah tangka kua kho lo dingin kan phih dih cikcek lai,” ati.
US zong nih fak chiahru in Russia sipuaizi kan phih chap lai, ati ve.
Chan thar ah ram pakhat nih ramdang lak dingin tuk cu zumh a har ko. Mah bantuk cu hlan lio lawng ah dara a um i tu chan ahcun a um ti rua lo kan ti lio ah Russia President Putin hi aaa…
Ref: CNN
